ДДНХИ нь Монгол Улсад ногоон санхүүжилтийг дэмжих бодлогын орчныг сайжруулах, аж ахуй нэгж, бизнес эрхлэгчдийн үйл ажиллагааг хүлэмжийн хийн ялгарал багатай дэвшилтэт технологид жендэрийн мэдрэмжтэй бөгөөд байгаль орчинд ээлтэй, төлбөрийн чадварт нийцсэн байдлаар шилжилт хийхэд дэмжлэг үзүүлэх тусгайлсан зорилготой төр, хувийн хэвшлийн хөрөнгө оруулалттай Монголын Ногоон санхүүгийн корпораци (МНСК)-ийг үүсгэн байгуулахад Монгол Улсын Засгийн газартай хамтран ажиллалаа. МНСК нь ногоон байгууламж, эрчим хүчний үр ашгийг нэмэгдүүлэхэд чиглэсэн бөөний санхүүжилтийг олгох замаар ногоон хөрөнгө оруулалт шаардлагатай байгаа хэсгүүдэд хүрч, дотоодын зах зээлийн санхүүжилтийн хэрэгцээг хангах байдлаар ажиллах юм. Эхний ээлжинд МНСК 50 сая ам.долларын ногоон хөрөнгө оруулалтыг хүлээн авахаар баталгаажсан байгаа нь Монгол Улсын ногоон санхүүжилтийг эрчимжүүлэхэд ач холбогдолтой юм. Иймээс МНСК- ийг Алсын хараа 2050 болон Монгол Улсын уур амьсгалын өөрчлөлттэй тэмцэх чиглэлээр баталсан бодлого, үндэсний хэмжээнд тодорхойлсон хувь нэмрийн зорилтыг биелүүлэхэд чухал оролцоотой ажиллана гэж харж байна. МНСК-ийн хэрэгжүүлэх төслүүдээс Монгол Улсын олон улсын өмнө хүлээсэн үүргийн биелэлт шууд болон шууд бус байдлаар тодорхой хэмжээнд хангагдах боломжтой. МНСК бол төр, хувийн хэвшил, олон улсын байгууллагын хамтран байгуулсан ногоон, бөөний санхүүжилтийн байгууллага гэдгээрээ бүс нутагтаа анхны онцлог загвар болж байгаа бөгөөд хүлэмжийн хийн ялгарал багатай, эрчим хүчний үр ашигтай шийдлүүдийг хэрэгжүүлэхэд таатай бодлогын орчныг бий болгох, ногоон, жендэрийн мэдрэмжтэй санхүүжилтийн эх үүсвэрийг татан төвлөрүүлэх, дотоодын зах зээлд үр ашигтай, хүртээмжтэй түгээхэд чухал үүрэг гүйцэтгэнэ.